Takimi Hapës i Projektit “Kujdes për Fëmijët – Parandalimi dhe Trajtimi i Skoliozës”

Më 6 Tetor 2025, në ambientet e Hotel Arvi në Durrës, u zhvillua Takimi Hapës i projektit “Kujdes për Fëmijët – Parandalimi dhe Trajtimi i Skoliozës”, një iniciativë e Rotary Club Durrës (Distrikti 2485) në partneritet me Rotary Club Keystone (Distrikti 7280, SHBA). Ky aktivitet shënoi nisjen zyrtare të një projekti të rëndësishëm komunitar që synon përmirësimin e shëndetit postural të fëmijëve dhe rritjen e ndërgjegjësimit për skoliozën në komunitet.
Takimi mblodhi përfaqësues të institucioneve publike, organizatave partnere, profesionistë të shëndetit, drejtues të arsimit, anëtarë të Rotary-t dhe përfaqësues të komunitetit. Aktiviteti u hap me përshëndetjet e Presidentit të Rotary Club Durrës dhe Guvernatorit të Distriktit 2485, të cilët theksuan rëndësinë e investimit në shëndetin e fëmijëve dhe fuqinë e bashkëpunimit ndërinstitucional për krijimin e ndryshimeve të qëndrueshme.
Gjatë prezantimit të projektit u ndanë rezultatet e vlerësimit të komunitetit, objektivat kryesore dhe përfitimet e pritshme për fëmijët, familjet dhe shkollat. U prezantuan gjithashtu partnerët kryesorë të projektit, përfshirë Drejtorinë Rajonale të Arsimit Durrës, Shoqatën e Fizioterapistëve të Shqipërisë, Bashkinë Durrës dhe Qendrën për Zhvillimin e Iniciativave Sociale, të cilët do të kontribuojnë në zbatimin e aktiviteteve të planifikuara.
Pjesë e rëndësishme e diskutimeve ishte plani i zbatimit të projektit, i cili përfshin pajisjen e shkollave me mjete për monitorimin dhe parandalimin e skoliozës, trajnimin e mësuesve të edukimit fizik dhe organizimin e aktiviteteve të ndërgjegjësimit për nxënësit, prindërit dhe komunitetin. Gjithashtu u prezantua strategjia e komunikimit dhe promovimit, duke përfshirë zhvillimin e faqes së internetit të projektit, seminare sensibilizuese, komunikimin në rrjetet sociale dhe raportimin periodik të rezultateve.
Takimi u mbyll me një diskutim të hapur ku pjesëmarrësit ndanë ide, sugjerime dhe angazhimin e tyre për të mbështetur projektin. Ky aktivitet vendosi themelet e një bashkëpunimi të gjerë institucional dhe komunitar për të siguruar një të ardhme më të shëndetshme për fëmijët tanë.