Seminar Ndërgjegjësimi: “Zbulimi i Hershëm i Skoliozës tek Fëmijët – Roli i Shkollës, Familjes dhe Komunitetit”

Më 12 shkurt 2026, në Qendrën Kulturore të Fëmijëve në Durrës, u zhvillua Seminari i Ndërgjegjësimit “Zbulimi i Hershëm i Skoliozës tek Fëmijët – Roli i Shkollës, Familjes dhe Komunitetit”, një aktivitet i organizuar në kuadër të projektit “Kujdes për Fëmijët – Parandalimi dhe Trajtimi i Skoliozës”, i mbështetur nga Rotary Club Durrës dhe partnerët institucionalë e profesionistë të shëndetit.
Seminari mblodhi së bashku përfaqësues të institucioneve arsimore, profesionistë të shëndetit, mësues të edukimit fizik, prindër, drejtues shkollash, rotarianë dhe anëtarë të komunitetit, me synimin për të rritur ndërgjegjësimin mbi rëndësinë e zbulimit të hershëm të deformimeve të shtyllës kurrizore tek fëmijët.
Aktiviteti u hap me prezantimin e projektit dhe përshëndetjet e përfaqësuesve të Rotary-t dhe institucioneve arsimore. Gjatë sesionit të parë, specialistët trajtuan aspektet mjekësore të skoliozës, rëndësinë e diagnostikimit të hershëm, pasojat afatgjata të mos-trajtimit dhe rolin e fizioterapisë në menaxhimin e saj. Gjithashtu u prezantua kontributi i Rotary-t në promovimin e shëndetit të fëmijëve përmes projekteve komunitare dhe bashkëpunimit ndërkombëtar.
Sesioni i dytë u fokusua në rolin e shkollës, familjes dhe komunitetit në identifikimin dhe parandalimin e hershëm të skoliozës. Mësues të edukimit fizik, psikologë, prindër dhe drejtues shkollash ndanë përvoja konkrete dhe praktika të mira mbi monitorimin e posturës së fëmijëve, promovimin e aktivitetit fizik dhe mbështetjen emocionale gjatë trajtimit.
Seminari përfaqëson një hap të rëndësishëm në forcimin e bashkëpunimit ndërmjet institucioneve, profesionistëve dhe familjeve për të garantuar një zhvillim të shëndetshëm të fëmijëve. Aktiviteti u mbyll me shpërndarjen e certifikatave për pjesëmarrësit dhe një thirrje të përbashkët për të vijuar angazhimin në mbrojtjen e shëndetit dhe mirëqenies së brezit të ri.